Chicken Biryani ,,

مرحبا ,,

تدوينة طبخ , بس اليوم شي يبغالو شغل شويا بس ترا سهل مو صعب صدقوني ,

وح تحبوه لو أتقنتوه , *,*

طبقنا هو ,

برياني دجاج

أستمتع بطبخو مدري ريحتو حلوة , مع أني ما أكلو ,

المهم خلونا نعملو سوا ونشوف كيف *,*

نحتاج :

بصل ,

ثوم ,

فلفل حار ,

زيت ,

صلصة ,

دجاج ,

بهارات برياني ,

علبة زبادي ,

زعفران وبودرة الزعفران ,

ماء ورد ,

رز ,

الشغل :

أول شي البصل حسب الكمية إلي ح تطبخيها , بس أقلك كتري منو لأنو لما تحمريه فالزيت ح يذبل ويصير نص الكمية ,

والبصل هو أساس البرياني , طيب تجيبي  البصل وتقطعية شرايح وسط , وتحطيه مع الزيت وتحطي معاه الثوم يكون مفروم ناعم ,

وتقلبيه ع النار إلين يحمر بشكل كبير , بس انتبهي مو ينحرق يتحمر بس ,

بعدين ح تضيفي الصلصة بس قليل تقريبا ملعقة صغيرة , وتقلبيها مع البصل والثوم ,
وتضيفي الفلفل الحار لو تحبي تقطعيها أو تحطيها كاملة , أنا احب اقطعها عشان يطلع الطعم مزبوط , XD

وتقلبي , بعدين تجيبي الدجاج تكوني مقطعتو أرباع , وتحطيه مع البصل وتقلبيه إلين يصير نص استواء ,

ضيفي عليها البهارات والملح وقلبيها ,

جيبي علبة زبادي وقلبي الزبادي فالعلبة إلين يصير سائل شويا , وبعدها حطيه ع الدجاج ووزعيه كويس ,

بس بدون ماتحركي بالملعقة ولا شي , يعني حطي الزبادي وبس بدون تحريك الدجاج وكدا ,

واتركيه على نار هادية إلين يتحمر الدجاج ويستوي  كويس ,

ولا تقفلي القدر بالغطاء , سيبيه مفتوح لأنو مانبغى تصير عندنا مرقة نبغاه ناشف شويا ,

وقت مانستنى الدجاج يتحمر , نجيب الرز بعد ماسلناه ونقعناه فمويا سُخنة وملح ,ونعملو فقدر تاني عادي  يكون رز أبيض سادة ,

تحطي الرز فالقدر مع مويا وشويا ملح وزيت ,

طبعاً نبغى الرز يكون ناشف شويا ومايتلزق فبعضو , عشان كدا انتبهي لكمية المويا ,

على بين مايتحمر الدجاج ح يتسوي الرز , وح نضيفو على الدجاج ,

وفصحن نكون ذوبنا الزعفران وصفار الزعفران مع مويا الورد وممكن شويا مويا عاديه ,

ونصبها فوق الرز زي ماتشوفو فالصورة ,

بعدين قفلي القدر بالقصدير وحطي الغطاء عليه , وحطي فوقو شي تقيل ,

عشان الرز ياخد طعم وريحة الدجاج والبصل ,

وسيبيه ربع ساعة كدا على نار هادية ,

وبس انتهينا , =P

- حاجات مهمة :

* البهارات هي أساس الطبخة , استخدمو البهارات الخاصة للبرياني تلاقوها فالسوبر ماركت ,

مرا أخدتها من عند السواق وكانت فعلبة نيدو بس صراحة مرا رهيبة , =D

* كمان لو تحبو ضيفو الكاري عليه ح يدي طعم ولون حلو بس قليل ,

* لا تكتري الصلصة عشان ماتدي لون أحمر قوي , وكمان لو كترت أحس تخبص الطعم ,
*انتبهي للملح وازني كويس بين ملح الدجاج وملح الرز عشان لماتحطيهم مع بعض مايطلعو مالحين مرا ,

* لا تكتري اللون إلي فالأخير لأنو ما ح يطلع شكل الرز حلو وهوا كلو أصفر , حلو يكون فيلو ألوان متدرجة ,

* زي ماقلت أنتبهي ماتحركي الدجاج بعد ماتحطي الزبادي اتركيه يتحمر بدون تحريك ,

* كمان القدر ماتغطيه إلا لما تحطي الرز ع الدجاج , لأنو ما نبغى يصير فيه مويا مع الدجاج ويصير البرياني معجن , 

حلاة البرياني فيلو نشوفة شويا ,

* للجميلات إلي يعملو دايت ويحبو ياكلو الرز , الأكلة خفيفة , الزيت نباتي خفيف , والرز أبيض مرا خفيف , والزبادي قليل الدسم كمان , يعني أكلة خفيفة ترا , بس مو معناتو تكتري فأكلو لا بالمعقول ,

* يتقدم مع سلطة حارة " طماطم وفلفل " مطحونين مع بعض بس ,

صحتين على قلبكم ,

’

|

للتواصيل إيميل :

samanoos67@gmail.com