Simple Cake ,,

 

 

 

 

مرحبا ,,

 

 

 

 

زمان ماعملت تدوينة من المطبخ ,XD

فاليوم ح تكون حاجة بسيطة وسريعة , والمهم أنو أحبها ,

 

 

الكيك شي مرا حلو بالنسبة ليا يفك أزمات وقت الجوع وع الفطور كدا مع حليب أو عصير برتقال فريش ,

لو كنتي تعملي دايت وحابة تاكليها ترا عادي قطعة ماتأثر ,

وكمان فيكي تعدلي شويا فالمقادير وح تكون أخف ,

 

 

 

 

* ماشاء الله كان مرا نااااعم وطري , *,*

 

يالله تعالو نعملها سوا :

  

نحتاج :

3 بيضات ,

1 كوب سكر ,

1 كوب زيت ,

1 كوب حليب ,

ملعقة بيكنج باودر ,

فانيلا ,

2ونص كاس دقيق ,

قطر موز "اختياري"

 

 

طريقتو :

أول شي تحطي البيض وخفقيه شويتين بعدين تضيفي السكر والفانيلا ,

ونسيبها تنخفق 10 دقايق تقريباً إلين يصير خفيف وينفش ,

 

بعدين نضيف الحليب , طبعاً الحليب إلي أحطو أنا يكون نص الكوب حليب بودرة ونص مويا ,

عادي ممكن نستخدم كوب كامل حليب سايل ,

وكمان نضيف الزيت ونسيبها تنخلط إلين تتمزج مع بعض كويس ,

 

 

بعدها ح نضيف الدقيق والبيكنج باودر , طبعاً نضيفو ملعقة ملعقة , عشان ينخلط كويس ,

وفالأخير ح نضيف قطرات بسيطة من قطر الموز , عشان يدي نكهة حلوة ولون خفيف ,
ممكن تدخلي أي نكهة تحبي , أو تسيبه سادة بدون نكهة ,

 

نجيب الصينية إلي ح ندخلها الفرن ونكون داهنينها ب بشويا زيت ونرش عليه دقيق ,  ونصب الخليط فيها ,

 

وندخلها الفرن يكون على درجة حرارة 180 ,

ونسيبها 30 دقيقة ,

 

 

 

 

 

* للجميلات إلي يعملو دايت :

 

ممكن السكر تحطو نص كوب ,

وكمان الزيت نص كوب ,

 

- طبعاً الزيت إلي أنا أستخدمو دايماً زيت دوار الشمس , لأنو خفيف ,

 

 

 

 

صحتين على قلبكم ,

 

 

 

’

|

 

للتواصل إيميل :

samanoos67@gmail.com