الرُمان ,

مرحبا ,,,

تدوينة صحية خفيفة ,

ذحين هو موسم فاكهة الرُمان ,

فاكهة جميلة جداً جداً من جد أنبسط لما يجي موسمها ,

تقدري تاكليها بأي طريقة تحبي سواء لوحدها أو تخلطي معاها شي ,

وممكن تعمليها عصير ,

* إلي يتابعوني ع الإنستقرام أكيد شافوا الفيديو إلي نزلتو وكتبت كم فايدة للرُمان ,

اليوم ح أقلكم على كم طريقة كمان لأكل الرُمان ,

وكلها صحية وطعمها لزيز ,

سلطة الجرجير بالرُمان ,

مكوناتها :

جرجير ,

رُمان ,

الصوص :

ملعقة صغيرة دبس الرُمان ,

ملعقة صغيرة خل أبيض ,

ملعقة كبيرة عصير الليمون ,

ملعقة كبيرة زيت زيتون ,

وتخلطيها مع بعض وتاكليها ع طول وصحتين على قلبك ,

فوائدها :

الزبادي بالرُمان ,

مكوناتها :

زبادي ,

رُمان ,

ملعقة صغيرة عصير الليمون ,

*إختياري الليمون ,

وبس خلاص عليك بألف عافية ولا أسهل ,

سموثي الرُمان والفواكة ,

مكوناته :

نص كوب عنب أسود مجمد ,

نص كوب حبيبات رُمان ,

حبة موز مجمدة ,

علبة زبادي ,

تخلطيها كلها مع بعض فالخلاط ,

ولو كان تقيل تقدري تزيدي شويا لبن ,

وما يحتاج سُكر لأنو كلي الفواكة إلي فيه حالية ,

وعليكم بالعافية ,

* ممكن نعملو كمان عصير , << بعد ماشرب وخلصت تذكرت أنو ماصورت =P

سواء فقط رُمان أو نضيف معاه زبادي  مع باشن فروت ,

* كمان مرا طعم مع الحمص البيروتي ,
ومع الفتوش برضو جميل ,

نجي نتكلم شويا عن فوائد ومكونات الرُمان ,

يحتوي ثمر الرُمان الحلو على 10.1% مواد سكرية، 1% حامض الليمون، 84.20% ماء، 2.91% رماد، 3% بروتين، 2.91% ألياف ومواد عفصية وعناصر مرة وفيتامينات (A, B, C) ومقادير قليلة من الحديد والفوسفور والكبريت والكلس والبوتاس والمنغنيز وفي بذوره ترتفع نسبة المواد الدهنية 7-9%.

مسكن للآلام ومخفض للحرارة ,

يروي العطش فالجو الحار ,

يعالج حالات اللإسهال ,

ويمنع النزيف الناتجمن البواسير ,

وعصير الرُمان جداً مفيد في تخفيف الصداع ,

وآلام البطن ,

ويشفي من أمراض العيون وضعف النظر ,

 كمان يفتح الشرايين ويحمي من السكتة والخرف ,

والسبب :

لأن عصير الرُمان غني بمجموعة كبيرة من المواد القوية المضادة للأكسدة كالمركبات الفينولية والتانين وآنثوسيانينن التي تعيق عمليات تأكسد البروتينات الشحمية قليلة الكثافة الحاملة للكوليسترول السيىء والمسببة لتصلب الشرايين.

حتى قشار الرُمان نقدر نستفيد منو , <3

فوائد قشر الرُمان :

 - مغلي قشر الرُمان يقوي اللثة ,

- مغلي قشر الرُمان فعال لحلات الإسهال ,

- مغلي قشر الرُمان يساعد في إبعاد بلغم المعدة ,

- القشر المحروق يخلط  مع عسل يمحي أثر الجدري مع الإستعمال المستمر ,

وكمان للجروح والقروح ,

  كانوا الفراعنة يستخدمونه لقتل ديدان البطن بواسطة حرق قشور الرمان وخلطها بالعسل , 

القيمة الغذائية للرُمان :

يحتوي على ,

سكر , بروتين , دهون , أملاح , فيتامينات , أحماض عضوية ,

صحتين على قلبكم ,

’

|

للتواصل إيميل :

samanoos67@gmail.com

منتجات أنهيتها وهل سأعيد شرائها أم لا ؟

مرحبا ,,

فالتدوينة دي ح أتكلم عن منتجات جربتها وخلصتها ع الآخر =P

و ح أحكيلكم تجربتي معاها وهل أرجع أشتريها أو لا ,

كريم الليل من لوريال ,

ماحبيتو الترطيب فيه عادي ,

و مرا ريحتو عطرية ولما أحطو واصحى الصبح اغسل وجهي يكون لزج ,

معناه ما امتصتو بشرتي وجلس بس طبقة عليها طول الليل ,

السعر بحدود 40 ريال ,

ما ح أرجع أشتريه ,

كريم النهار من لوريال ,

برضو عادي مايرطب ولا حاجة ,

ويكون زي الطبقة البيضاء ع البشرة لفترة بسيطة ,

السعر بحدود 40 ريال ,

ما ح أرجع أشتريه ,

غسول نيتروجينا ,

هو لحب الشباب ,

الحمد لله ما أعاني من الحبوب بس احب استخدمو لمنطقة الأنف لأنو دهنية عندي ,

مرا حلو ومن قلب ينظفها ,

هو ينفع كتير للبشرة الدهنية بس الجافة لا لأنو مرا ينشف البشرة ,

السعر مرا مو فاكرة بس أتوقع بحدود 20 ريال ,

ح أرجع أشتريه دائماً ,

حبوب هير دال ,

هيا فيها فيتامينات ومعادن ,

يعني كويسة للشعر والبشرة ,

بس أنا جربتها 4 شهور بس ما لقيت أي نتيجة ملحوظة ,

غير حاجة وحدة أنو فتحت شهيتي ,

السعر مرا مو فاكرة ,

ما ح أرجع أشتريها ,

بلسم الشعر بالموز من بودي شوب ,

مرا جميل و أحب شعري بعد ما استخدمو ,

يطري الشعر وينعمو ,

استخدمو بعد المسبح أو بعد التمرين لما ما ح أغسل شعري بشامبو ,

ريحتو لطيفة ,

السعر 29 ريال ,

ح أرجع أشتريه دائماً ,

وبس خلصنا ,

أتمنى تكونوا أستفدتوا ,

’

|

للتواصل إيميل :

samanoos67@gmail.com

صباحاتكم رياضية وسعيدة ,,

مرحبا ,,

تدوينة صباحية كدا رايقة ,

بما انو ليا فترة ما دونت وخصوصاً عن الرياضة ,

فاليوم إن شاء الله ح تكون دردشة خفيفة ,

* أول شغلة حابة أقولها مافي شي صعب فالحياة ,

ودام غيرك قدرت تعملو أكيد أنتي كمان ح تقدري ,

أنا ما أعرف ليش الناس مستصعبة الرياضة وأنو تكون روتين يومي فحياة الشخص ,

والبعض مثلاً يشكك أنو ممكن فيه بني آدمين يهتموا بالرياضة وحركين ,

ترا مرا شي عادي ومو إختراع ولا واااو ,

كل إنسان فالحياة دي يقدر يعملها ,

دام أنو بصحة جيدة والأهم تساعدو عليها ,

* تاني شغلة مو شرط الواحد يتقن الشي أو يكون فاهم فيه لأنو تخصصو ودرسو فقط ,

لا دا شي مرا غلط ,

ممكن الواحد بالقراءة والإطلاع المستمر يتعرف على أي شي فالحياة ,

وأصلاً لما تدرسو تخصص معين إيش يعتمد عليه ؟؟

يعتمد على كتب وحاجات تقروئها فقط يعني ما أخترعتوا شي من عندكم ,

فشي طبيعي إنسان عادي مادخل مجال معين ومادرسو ,

بس أبدع فيه وصار ملم فيه لأنو قرأ وبحث وصار فاهم فيه ,

وأحياناً شخص درس تخصص معين أبداً ما أبدع فيه ومو فاهم فيه ,

وأكبر مثال أحكيه لكم أنا , XD

تخصصي إلي درستو فالجامعة وتخرجت منو ماطبقتو فحياتي نهائياً ,

ولا عندي الرغبة في ذلك ,

يعني بس اعتمدت ع إلي درستو ذاكرت حفظت وتخرجت وخلاص ,

أبداً مافكرت أتعمق فيه وأبحث وأقرأ بشكل أكبر ,

عكس الرياضة والصحة ,

جداً أهتم بأي مقالة أو حتى عبارة بسيطة تهتم بدا الشي ,

دائماً أدور على الحسابات المهتمة بكدا ,

ما أقول أنو أنا مرا ملمة ومرا فاهمة فدا الشي بس عندي معلومات لابأس بها ,

زبدة الكلام مو دايماً شهاداتنا وتخصصاتنا تكون فالشي إلي نحب ,

ولا ح نبدع فإلي درسناه فقط ,

واهتموا بالقراءة والإطلاع دائماً ,

جددوا معلوماتكم وأفكاركم شوفوا واكتشفوا ولا تعتمدوا ع السؤال فقط ,

كونوا أنتوا مرجع لغيركم ولا تخلو أحد مرجع لكم ,

* نجي لتالت شغلة بخصوص التمارين والرياضة عموماً ,

أجسامنا مختلفة عن بعضها تماماً ,

حتى الأخوات التوأم مختلفين على فكرة ,

فشي ناسبني وجسمي تقبلو وما تضرر منو مو شرط يصير معاك نفس الشي ,

بتقولي طيب كيف أعرف إيش يناسبني ؟

بأقلك أول شي أفهمي جسمك وتاني شي بالتجربة الله يعينك تتعلمي ,

لا تقارني نفسك وجسمك بوحدة تانية نهائياً ,

انسي كل إلي حواليك وركزي فنفسك بس << طبعاً الشي دا ينطبق على كل شي فالحياة ,

لا تقولي فلانة نحفت من الرياضة الفلانية والدايت الفلاني ,

لا تقولي فلانة مانفعت معاها التمارين دي ومرضت من الدايت دا ,

أنتي لو تحبي نفسك وترضي عن ذاتك ,

صدقيني كل شي ح يسهل عليك ,

حبي جسمك وشكلك كيف ماكان ولا تعقدي نفسك وتحبطيها ,

فيك عيوب صلحيها شي مو عاجبك عدليه وبكل حب وهدوء ,

والله يسعدكم ويخليكم لأهاليكم كلكم ,

لا عاد تقارنوا بين العرب والأجانب ,

هما ماهم أحسن مننا أبداً ولا هما أجمل مننا ولا أفهم مننا ,

أنتوا حطوا فبالكم أنو حياتنا وعاداتنا وطبيعة منطقتنا غير عنهم كلياً بس ,

وبطلوا  إنتقاص أنفسكم وبلدكم ,

* رابع شغلة مهمة كمان ,

ح اسألكم وجابوا بعدين اقرأوا كلامي ,

* لك 10 سنوات تخبصي فالأكل ولياقتك 0 هل بسهولة ح توصلي لتغيير ؟

- طبعاً فيه ناس أكتر من كدا وفيه ناس من أول ما أنخلقت مخبصة ,

ترا عادي كلنا كنا كدا لكن الشاطر إلي غير أو بدأ يغير ,

طيب أجي أجاوب ع السؤال ,

التغيير مو سسهل بس كمان مو صعب ,

هو سهل لما يكون عندك عزيمة وإرادة قوية جداً ,

وماتكون بس للتغيير فقط تكون للتغيير وللمحافظة عليه مدى الحياة ,

ويكون عندك صبر وتحمل وطولة بال ,

ومافي شي يجي بسرعة ,

يعني سنين وسنين وانتي تخبصي وتخزني دهون ,

مو معقولة فشهر تتخلصي منها ,

إلا في حالة وحدة عمليات شفط الدهون بس ,

* خامس شغلة مالها علاقة بالرياضة بس كدا فخاطري ,

اتركوا الناس تعيش براحتها ,

بطلوا وصاية على الناس ,

أنتي مقتنعة بشي لا تفرضيه على غيرك ,

إذا محد طلب رأيك ومشورتك فاحتفظي فيها لنفسك ,

ولو اصريتي وأبديتيها وقتها تحملي أي رد أو تصرف يجيك ,

لا تتدخلوا فحياة أو رأي أو معتقدات أي إنسان كان ,

عاملوا الناس بناءاً على إنسانيتهم ,

بغض النظر عن دينهم , مذهبهم , لونهم أو جنسيتهم ,

دعوا الخلق للخالق وعيشوا حياتكم أنتوا عشان تنبسطوا فيها وماتضيعوا أحلى الأوقات ,

* آخر شي لازم أفيدكم بشي تمرين تعملوه ع الصبح وتستفيدوا ,

أفضل 10 تمارين قلبية "كارديو" لحرق السعرات الحرارية ,

كل تمرين موضح السعرات إلي تنحرق أثناء ممارسته ,

ممكن تختاري واحد منها وتعمليه لمدة 60 دقيقة ,

أتمنى تكون التدوينة مفيدة وخفيفة ,

’

|

للتواصل إيميل :

samanoos67@gmail.com

Basbousa ,,

مرحبا ,

اليوم كمان تدوينة من المطبخ ,

شي سريع وخفيف ماحبيت اطول بدون ما اكتب شي , :$

بسبوسة ,

نحتاج :

علبة زبادي ,

سميد ,

جوز الهند ,

زيت ,

سكر ,

3 بيضات ,

2 ملعقة كبيرة بيكنج باودر ,

ملعقة صغيرة فانيلا ,

الشغل :

فالخلاط نحط علبة الزبادي وبنفس العلبة نحط مقدار والسكر وجوز الهند والزيت ,

وكمان نضيف البيض والبيكنج باودر والفانيلا ,

ونخلطهم لمدة 3 دقايق ,

في زبدية نحط السميد مقدارو بنفس علبة الزيادي  , علبة ونص , 

ونصب عليها الخليط إلي قل ونقلبها بالمضرب الشبط ,

إلين تتلخط كويس مع بعض ,

بعدين نجيب الصينية إلي ح نحطها فيها وندهنها بقليل طحينة ,

ونسكب الخليط فيها وندخلها الفرن ,

تقريباً تاخد نص ساعة على نار هادية عشان تستوي وتتحمر من فوق وتحت ,

بعدها تطلعيها وتصبي عليها القطر وتتركيها تبرد ,

بعدين قطعيها زي ماتحبي ,

* تقدرو تزينوها باللوز لو تحبو قبل تدخلوها الفرن ,

* للجميلات إلي يعملو دايت :

ممكن تقللو كمية السكر والزيت لنص ,

وماتحطو عليها قطر بكمية كبيرة , << وتقدرو تستغنو عنو لو تحبو ,

والزبادي يكون قليل الدسم ,

صحتين على قلبكم ,

’

|

للتواصل إيميل :

samanoos67@gmail.com

Fırın Sütlaç ,,

مرحبا ,

تدوينة من المطبخ ,
حلى مو جديد بس مرا لذيذ وطعم وكمان سهل ,

رز بلبن أو رز بحليب , 

نحتاج :

1/2 كوب أزر مصري ,

5 أكواب ماء ,

1/2 سكر ,

كوب حليب باودر ,
كوب مويا لتدويب الحليب ,

قشطة ,

الشغل :

نحط الرز مع المويا فالحلة ونتركهم على نار هادية إلين يستوي الرز ,

بعدين نضيف الحليب والسكر , ونقلبهم إلين يتجانسو ,

نشيل الحلة من ع النار ونضيف القشطة ونقلب ,

عشان تتخلط مع بعض كويس ,

ونحطها فالطبق المناسب لها ,

يعني لو ح تدخليها الفرن تحمريها حطيها فطبق يتحمل حرارة الفرن ,
أنا أحبها فالفخار أحس طعمها أجمل وكدا ذكريات جميلة , :$

لو ح تحطيها فالتلاجة على طول عادي حطي أي طبق ,

وإذا ماحمرتيها فالفرن رشي عليها باودر قرفة ,
مرا ح يكون شي طعم , D=

وهنا شكلها بدون ما تتحمر فالفرن , =P

* للجميلات إلي يعملو دايت :

ممكن تقللو كمية السكر لربع كوب ,

أو تستخدمو المحلي زي ستيفيانا أو إلي تحبي ,

والحليب يكون قليل الدسم ,

صحتين على قلبكم ,

’

|

للتواصل إيميل :

samanoos67@gmail.com

Kubba ,,

مرحبا ,,

تدوينة من المطبخ ,

اليوم ح أوريكم طريقتي المفضلة للكبة ,

مرا سهلة وبسيطة ومكوناتها متوفرة دايماً ,

نحتاج ,

كيس توست بُر ,
ربع ملعقة صغيرة ملح ,
ملعقة صغيرة فلفل أسود ,
علبة حليب شاهي ,
لحمة مفرومة ,
بصل وثوم مفروم ,
صنوبر محمص ,

الشغل ,

نجيب التوست ونطحنو بالكامل بدون مانشيل الأطراف ,
نحط عليه الملح والفلفل الأسود وحليب الشاهي ,
ونعجنها مع بعض إلين نوصل للقوام المناسب ,
يعني ماتكون سايلة ولا جافة ماتتماسك ,


بالنسبة للحشوة ,
ح نحط البصل المفروم ع النار مع زيت زيتون ,
وبعدين نضيف الثوم المفروم , ونقلبهم إلين يدبلو ويتحمرو قليل ,
بعدين نضيف اللحمة المفرومة ونقلب إلين تستوي ,
ونحط البهارات المناسبة ,
انا أحط كمون وقليل فلفل أسود ,


وبعد ماتستوي كاملة ,
ح نضيف عليها الصنوبر المحمص ,


بعدها نجيب عجينة التوست إلي عملناها قبل ,
ونشكلها بالشكل المناسب ونحط جواتها الحشوة ,
ماتخلوها سميكة مرا ولا رقيقة مرا يعني وسط ,


لما تخلصي قبل تقليها لازم تحطيها فالفريزر ع الأقل ساعة كاملة عشان تجمد ,
وممكن تعمليها من الليل وتتركيها فالفريزر ,


كدا شكلها قبل القلي "مجمدة" ,

وبس خلصنا ,

طعمها لذيذ ومو بعيدة عن الكبة العادية , وتقدرو تعملوها فالفرن بدال القلي فالزيت ,

عشان تكون أخف شويا ,

صحتين على قلبكم ,

’

|

للتواصل إيميل :

samanoos67@gmail.com

Ramadan Kareem ,,

مرحبا ,

رمضان جانا وفرحنا به , أهلاً رمضان , =P

جا رمضان شهر التخمة والزيادات المهولة فالأوزان ,

مع أنو المفروض يصير العكس بحسب نظام الصيام وكدا ,

^

لكن بإذن الله ح  يكون رمضان السنة دي غير للجميع ,

و ح نحافظ على أوزاننا أو ننقصها والأهم من دا كلو أنو نكون صحيين ,

مافي شي صعب مافي مستحيل ,

مهما كنا منشغلين أو عادات وتقاليد العيلة تجبرنا على شي ,

احنا ح نغير كل دا للأفضل وبالمعقول وبدون تعب كبير ,

التدوينة ح تكون نصائح كدا خفيفة وبسيطة ,

لليوم الرمضاني كامل ,

و ح تكون نصائح عامة للجميع بغض النظر عن هدفك ,

لأنو الهدف من دي النصائح لصحة ممتازة ,

السحور :

هي الوجبة المهمة عشان تساعدك على الصيام طول اليوم ,

أغذية مقترحة :

دائماً ينصح بأكل الأغذية المحتوية ع الألياف ,

لأنو مافيها دهون ودسم ,

وكمان تفيد المعدة والأمعاء وتحسسك بالشبع لفترة ,

مثال :

منتجات القمح الكامل ,

نخالة القمح والذرة ,

الخضروات والفواكة بجيمع أنواعها ,

كمان كلي الأغذية الغنية بالماغنيسيوم ,

مثال :

التين ,

المكسرات ,

الأفوكادو ,

المشمش ,

الموز ,

التمر ,

السبانخ ,

كمان ماتنسي تضيفي نوع من الألبان ,

أغذية يجب تجنبها :

الأكلات والمشروبات المليانة بالسكر والمصنعة ,

زي الكيك والشوكولاتة والفيمتو والتانج وكدا ,

لأنو ترفع معدل السكر عندك وكمان تنحرق بشكل سريع بدون فائدة ,

وح تسبب هبوط في سكر الدم وقت الصيام ,

الفطور :

دي الوجبة مهمة في موضوع تغيير العادات الرمضانية الخاطئة ,

وهي إلي ع أساسها ياتحافظي على صحتك ووزنك ياتعدميهم ,

أغذية مقترحة :

أول شي لازم تكون خفيفة وماتتخم بطنك وتحسسك بالتقل طول اليوم ,

وتكون معتدلة وتعوض جسمك عن فترة الصيام ,

ابدأي 3 - 7 تمرات ,

مع كاس لبن أو حليب أو مويا أو حتى زبادي ,

بعدها قومي صلي المغرب وادي جسمك فترة كدا يستوعب أنو في خير وأكل جاي , =P

بعد كدا كلي من الأكل الموجود ,

طبعاً كلي بالمعقول وماتكتري ومو لازم تدوقي كل شي ع السفرة ,

لو نفسك تحلي خليه بعد صلاة التراويح ,

يعني شوي شوي ع المعدة تستوعي إلي قبل وكدا ,

لأنو لما تاكلي بكميات كبيرة وورا بعض ,

الجسم ماعاد ح يحرق إلي تاكليه وح يخزن الباقي على شكل دهون ,

ولما تاكلي الحلو برضو بالمعقول وماتكتري ,

يعني ذواقة كدا ,

وشرب الشاي الأخضر أو الزنجبيل بعد الفطور أو مع الحلى ,

حلو ح يساعدكم على الهضم وكدا ,

أغذية يجب تجنبها :

ابتعدي عن الأغذية المليئة بالدهون والألياف ,

عشان ماتسبب لك عسر هضم وتتعبك ,

لا تشربي كمية كبيرة من السوائل ودفعة وحدة ,

عشان ماتسبب نفخة فبطنك وكمان تضايقك ,

* شرب المويا يعني كل ساعة كدا اشربي كاس ,

التمارين الرياضية ,

أفضل وقت للرياضة هو قبل الفطور ,

لأنو الجسم وقتها ح يحرق أكتر ,

يعني قبل وقت الفطور بساعة تقريباً ,

تعملي رياضتك وتخلصي قبل الأذان ع الأقل 10 دقايق ,

عشان تاكلي وتستفيدي وتستفيد عضلاتك وماتضمر ,

ح تقولي ما أقدر اتحمل , ماعندي وقت مشغولة ,

أقلك طيب اعمليها بعد الفطور بساعتين لتلات ساعات ,

رمضان كريم ,

وأتمنى لكم صياماً سهلاً وإفطار شهياً ,

وربنا يتقبل من الجميع ,

’

|

للتواصل إيميل :

samanoos67@gmail.com