Focus T25 ,,

مرحبا ,

تدوينة رياضية جميلة ,

مدري أحس مبسوطة وأنا أكتبها ,

لأنو شي جميل وح يعجبكم بإذن الله ,

عبارة عن برنامج للمدرب المفضل عندي SHUN T

هو آخر شي نزل ,

والحلو فيه أنو ماياخد منكم غير 25 دقيقة فاليوم ,

يعني الناس الكسولة , المشغولة و الملولة ,

أشوف أنو ح يناسبهم كتير ,

هو من زمان نزل بس قلت أجرب وكدا ,

عشان أقدر أكتب عنو لو أنصحكم فيه أو لا ,

فالبداية عارفين شون كيف مايمزح فالتمارين ,

يعني قلك تمرين فعلاً تمرين يخلي كل خلية فجسمك تعرق ,

وكل عضلة فجسمك تنبض وتنشد ,

إلي جربت الإنسانتي أو شافتها ,
دي تقريباً مشابهة لها بس بوقت أقصر ,

بس تخلصي من الجدول كامل وح تحصلي ع النتائج إلي وعدك فيها ,

إي نعم ح تتعبي وكدا بس فالآخر تنبسطي بالتغيير وتنسي التعب ,

Focus T25

نبدأ بسم الله ,

زي ماقلت قبل هو مدتو 25 دقيقة فقط ,

طبعاً بما أنو مدة قصير فالمفروض أنو قد ماتقدري تعمليها متواصلة وبدون إستراحة وتوقف ,

طبعاً المفروض ماتاخدوا إستراحة ,

ولو حسيتوا بتعب وإجهاد خففوا حدة التمرين وأتبعو تانيا ,

يعني المبتدئين أو إلي مايقدروا يعملوا التمارين بالمستوى العالي يتبعوها هيا ,

شوفها دي , ودايماً تكون قدام ع اليمين ,

طبعاً ماتستهينوا بالدقايق القليلة دي ,

لأنو التمارين إلي تُمارس فيها يوصل حرق السعرات الحرارية فيها لـ600 سعرة خلال الـ25 دقيقة ,

التمارين ح تكون لمدة 5 أيام فالأسبوع ,

ويوم ح يكون للتمدد فقط ويوم إستراحة محارب , =P

ولمدة 14 أسبوع ,

ما ح نحتاج أدوات صعبة وغير متوفرة ,

كل إلي نحتاجو حبال مقاومة وأثقال بوزن يناسبك وفرشة عشان التمارين ع الأرض ,

طبعاً حبل المقاومة بديل للأثقال فعادي المتوفر عندك استخدميه ،

هو يحتوي على أربع مستويات :

Alpha 

Beta

Gamma

Resistance band

 فيه كم مستوى يحتوي ع الأثقال ,

لكن عادي مو صعبة و تكون الأثقال خفيفة قد ماتتحملي يعني ,

كل يوم ح يعمل التمارين بالضبط لمدة 25 دقيقة ,
فاليوم الخامس ح نعمل تمرينين يعني مدة 50 دقيقة ,

و بعد كل تمرين تلات دقايق كدا ستريتشنق ,

و التمارين كلها تحتاج للتركيز عشان تعملوها بالشكل الصحيح وتستفيدوا 100% ,

وأنتو ح تلاحظوا أنو هو دائماً وبشكل مستمر يكرر أنو ركزوأ وركزوا ,

حتى فيه تمارين أنتوا ممكن تستسهلوها كدا بس هي تعتمد ع التركيز وهو إلي ح يخليها تكون أشد ,

نتائج البرنامج :

ح يساعد كتير على إنزال الوزن ,

وأيضاً شد الجسم ,

وبروز العضلات ح يكون حسب الجسم وكمان حسب الأكل والبروتينات وكدا ,

فلا تخافوا ولا احد يقلي يبرز عضلات ،
حتى شون بنفسو وقت التمرين بالأثقال يقول أنو النساء إلي يخافوا من بروز العضلات ما ح تبرز لهم ،

فيديو يوضح البرنامج أكتر ,

وكمان يعرض صور قبل وبعد للناس إلي عملوه ,

هنا التحميل على تورنت ,

http://thepiratebay.sx/torrent/8755422/Focus_T25_Alpha__Beta__Gamma_-_x256_-_MP4_-_DVDrip

وهنا تلاقوا الجدول ,

http://www.mediafire.com/download/mfw341lms4wv80s/Workout+Calendars.pdf

هنا تلاقوا البرنامج على موقع BechBody ,

http://www.beachbody.com/product/fitness_programs/focus-t25-workout.do

فالنهاية أكيد ح أذكركم أنو المحافظة ع الأكل كمان تساعدكم ,
وهو الأساس للتغيير ،

يعني ضروري أنو تعدلو نظام أكلكم وقت عمل البرنامج ,

عشان تلاقوا النتائج الفعلية والمرضية ,

لا تنسوا تعملوها فمكان مناسب وبتهوية ممتازة ,

وتلبسوا اللبس الرياضي المريح والمناسب ,

وأكيد مع البرا والجزمة بالمقاسات المناسبة ,

وكمان حلو أنو تاخدوا صورة قبل تبدأ وبعد ماتنتهوا ,

عشان تشوفوا الفرق كيف وتنبسطوا , =D

أتمنى تكون التدوينة مفيدة ,

وأي سؤال أنا حاضرة ,

’

|

للتواصل إيميل :

samanoos67@gmail.com