مرحبا ,,
اليوم تدوينة كدا نقدر نقول هرج وفيها بعض المعلومات إلي ح تفيدكم بإذن الله ,
وهيا تقريباً مرجع لأغلب الأسئلة إلي توصلني ,
طبعاً أكيد ح تكون ع الرياضة والصحة والجمال , لأنو تلاتتهم يرتبطو ببعض بشكل كبير ,
* البوست للكل سواء بتزيدي أو تنقصي أو تثبتي ,,
- تبغي جسمك يكون مرتب وحلو وتكوني راضية عنو , سواء كنتي تبغي تزيدي وزنك أو تنقصيه ؟!
طيب أحب أقلك مافي حل سحري تنامي وتصحي وتكوني بيرفكت ,
لازم ح تتعبي وتشتغلي على نفسك ,
وأول وأفضل حل هو إتباع نظام صحي في الأكل مع التمارين الرياضة والمشي ,
ح تقولي الأكل ما أثر على وزني لا بزيادة ولا بنقصان ,
أقلك الرياضة ح تأثر وتديك نتايج ترضيك ,
لا تهتمي بالميزان , المهم شكل جسمك شوفي كيف شد وبان شكلك أنحف وملابسك صارت وسيعة ,
أو شفتي جسمك بين أسمن وصرتي تلاقي ملابس على قياسك ,
- كيف يكون تأثير الرياضة ع الوزن ؟!
لما تشتغلي ع التمارين تبدأ تنبني عضلات جسمك وتشد , وفنفس الوقت ح تذوب الدهون الزائدة ,
فلما تذوب الدهون وينبني بدالها عضلات هنا العضلات تكسبك الوزن ,
طيب أوضح أكتر :
مثلاً جسمك فيلو 2 كيلو دهون , عملتي تمارين وغيرتي نظامك لنظام صحي ,
الـ 2 كيلو من الدهون ح يذوبو ويجي بدالهم 2 كيلو عضلات ,
العضلات دي أوك تدي وزن بس ماتدي الجسم شكل مو كويس أو زوائد ,
ودا هو المطلوب ودا هو الشي الممتاز ,
أوقات تشوفي ناس أشكال أجسامهم نحيفة بس ع الميزان وزنهم عالي , ليش ؟!
لأنو الجسم مرتب ومشدود ومليان عضلات لها وزنها ,
طيب , فيه نقطة مهمة لازم ماتنسوها ,
لو كنتي تعملي رياضة بس ماغيرتي نظام أكلك وعدلتيه لنظام صحي , ما ح يكون فيه فايدة ,
حتى لو أنتي تبغي تسمني مو معناتو تاخدي راحتك فالأكل وتخبصي لا ,
عدلي أكلك بأكل صحي ومع الرياضة ح تشوفي وزنك كيف يتعدل ,
- تبغي نظام ريجيم وأكل معين ؟!
لو متابعيني كويس ح تلاحظو وتعرفو أنو أنا ضد تحديد الأكل وفكرة الريجيم والحرمان من بعض الأكلات ,
لأنو مو معقولة ح تعيشي طول حياتك على نظام الحرمان وتحديد الأكل ,
وممكن تستفيدي منو وبينزل وزنك وكلو تمام , بس بعد فترة لازم ح تملي وتغيري النظام وفيه ناس ترجع للأسوء ,
فأنتي المفروض تكوني فاهمة جسمك وتبدأي تعملي نظام يناسبك , ويكون نظام جيد وصحي ,
ويكون نظام معقول عشان خلاص تصيري تعتمديه كنظام أبدي ,
كلي من كل شي من كل شي << بمعنى كل شي إيوا
بس بالمعقول وبإعتدال ,
شي اشتهيتيه مافي مشكلة تاكلي قطعة منو كدا عشان نفسك فيه ,
لأنو أوقات الجسم من كتر الحرمان يبدأ نقدر نقول يعند , ويرفض يخسر أو يذوب أي سعرات أو دهون فيه ,
وأي سعرة حرارية تدخل للجسم يحتفظ فيها ,
وأحياناً من كتر الحرمان تجي لحظة ضعف وتبدأ مرحلة عدم السيطرة على الأكل ويصير تاكلي كل شي وبشراهة وماتحسي بنفسك ,
فأول تدوينة لي عن الرياضة ,
قلتلكم على معادلتين ضروري تعرفوها وتفهموها , وإلي هيا :
أكل طبيعي + رياضة = وزن ثابت ,
أكل أقل + رياضة = نزول الوزن ,
* "ولو أشتغلتي أكتر على تمارين العضلات وزدتي نسبة البروتين فأكلك ح يصير زيادة فالوزن من العضلات مو دهون"
- كيف المفروض يكون نظام الأكل مع التمارين ؟!
طبعاً المفروض يكون أكلك صحي وبكميات معقولة , يعني ماتحرمي نفسك بشكل كبير , وتنقصي على نفسك فوائد ,
ولا تكتري أكتر من حاجة جسمك ويصير فيه تخزين للفائض , طيب نظام الأكل كيف ؟
لازم قبل التمرين تكوني ماكله وجبة عدلة كدا , بس ماتكون دسمة وثقيلة ع المعدة , لأنو بعد ساعتين ع الأقل من الوجبة ح يكون التمرين ,
يعني كلي إيدام خضار مع رز أبيض سادة , صدر دجاجة مشوي مع خبز بُر , فيلية سمك , زي كدا يعني ,
وطبعاً لازم وجبتك يكون تلات أرباعها خضار , كيف ماكانت مطبوخة مسلوقة مشوية سلطة عادية , أي شي المهم خضار ,
وتدخلي اللبن أو الزبادي , وكمان قطعة فواكة ,
هنا أكلنا وجبتنا وبعد ساعتين عملنا التمرين وخلصنا ,
جت الوجبة إلي بعد التمرين , ضروري تاكلي شي بعد التمرين , مثلاً توست بُر مع بيض مع شريحة جبن مع كاسة عصير أو حليب ,
وعشان تستفيدي بعد التمرين أكتر , وتنبني عضلاتك كويس لازم يكون فيه بروتين فوجبتك , من أي مصدر بس يكون طبيعي أفضل ,
المهم الوجبة دي كمان مايكون فيها دهون عالية خفيفة , أحنا نبغى نعوض بشي مفيد , مو نرجع الي حرقناه من السعرات الزائدة ,
لا تفكري أنك إذا تبغي تنزلي وزنك تحرمي نفسك من السكر نهائياً مثلاً أو النشويات أو غيرها ,
لا حبيبتي غلط جسمك يحتاجها ترا ,
يحتاج حصة يومية من السكر مثلاً , بس أرجع وأقول كلي بالمعقول ,
* فأكلك لا تفكري تستخدمي المحليات الصانعية , ليش ؟!
أوك هيا سعراتها أقل , بس تفتح شهيتك أكتر وتخليك تاكلي كمية زايدة ,
عكس السكر العادي سعراتو عالية بس ما يخليك تاكلي بزيادة زي المحليات الصناعية ,
- تفكري بالأعشان والحبوب كأبسط وأسرع طريقة تلجئي لها لزيادة أو إنقاص الوزن ؟!
هنا أحب أقولك أنو دي أكبر مصيبة ممكن ترتكبيها فحق نفسك , لأنها ح تضرك أكتر من أنها تنفعك ,
تاني شي وأهم شي , أي شي يجي بسهولة يروح بسهلة ,
يعني خسرتي وزنك بدون أي تعب أو مجهود , فما ح تحافظي عليه وما ح تهتمي , لأنو ماتعبتي عادي ,
غير أنو صحتك مع نزول وزنك عليها مو تمام ,
وهنا حابة أنبهكم أنو فيه مدربات تجيك تقلك ح أديك عشبة أو حبوب أو خرابيط , أبداً لا تفكري تتهوري ,
حتى لو قلتي مدربتي وأثق فيها , كلو كدب ووهم ,
حتى الكريمات إلي يقلك بس أدهني لمدة 5 دقايق وح تخسي , ويختفي السلوليت ,
طبعاً بس أسمع عن دي الكريمات الفتاكة ,
هنا من جد أضحك من السحر الفتاك الموجود فيها ههههههههههههه
طيب أقلك لو استخدمتيها ح تحسي بفرق إيوا , بس عارفين ليش أو إيش السر ؟
الكلام كلو فالمساج , لما تعملي مساج لمنطقة فجسمك ولمدة معينة , أنتي هنا حركتي الدورة الدموية وحركتي الدهون وبدت تتكسر وتذوب ويترتب كل شي ,
والكريم طبعاً فقط مساعد على حركة المساج بشكل أسهل ,
يعني بدال ماتدفعي مبلغ وقدرة وماتدري إيش مكونات الكريم ولو ح تناسب بشرتك أو لا , خدي أقرب كريم أو زيت عندك واعملي المساج , وحطي فبالك أنو الحركة مو معناتو أنو ح تخسي بشكل كبير و واااو , لالا ياعيوني ح تلاحظي فرق بسيط وخصوصاً للي عندهم سلوليت ح يبدأ يخف ويصير الجلد مشدود ومسطح ,
ونفس الشي الشاي تبع التخسيس ,
و تقولي طيب تنصحي بشرب الشاي الأخضر وتقولي يساعد بتخفيف الوزن ,
أوك أنا قلت يساعد يساعد يساعد وليس عنصر أساسي ,
مو معقولة تخبصي فالأكل وبعدين تشربي كوب شاي أخضر وليمون و ح يمحي الخبيصة إلي عملتيها ,
هنا أنتي ممكن تكوني تريحي ضميرك بس ,
وبعدين خدو الشاي الأخضر كفائدة صحية للجسم قبل يكون مساعد لتخفيف الوزن ,
لأنو جداً شي حلو مفيد للصحة عموماً ,
- متى تبدأ توضح تأثيرات التمارين ع الجسم ؟! وهل المشي ضروري ؟!
هنا أقلك حسب شغلك وإنتظامك فالأكل وممارسة الرياضة ,
لو كنتي ماشية تمام وكدا خلال أسبوعين ح تلاحظي بداية الفرق والتأثير الحاصل ,
ومن شهر ح يكون التأثير والفرق واضح بشكل كبير ,
نجي للمشي , يعني هو أهم وأفضل رياضة للجسم كامل ,
ممارسته يومياً شي ضروري , وإعتماده قبل التمرين للإحماء , و حلو لشد الأفخاذ والساقين بالكامل ,
ولكن لو مو قادرة تمارسيه لأي ظرف كان بس حابه تمارسي التمارين الرياضة التانية بدونو ,
فعادي ينفع وح تأثر التمارين وتفيدك ,
بس دايماً وقد مانقدر نخلي فجدولنا اليومي وقت للمشي لو ربع ساعة ,
- الوقت المناسب للتمارين ؟!
أكيد الصبح هو أفضل وقت , لأنو يكون الجسم وقتها فكامل نشاطو , وكمان حلو تبدأي يومك بحماس ونشاط ,
بس كمان عادي لو تعملي التمرين فأي وقت يناسبك وتكوني فاضية ورايقة فيه ,
الوقت ترا من أهم الأسباب إلي يخليك تنبسطي وماتملي من التمرين , لأنك تختاري الوقت إلي تحسي نفسك ب قمة روقانك وحماسك ,
والأفضل تكون فمكان مفتوح وبتهوية جيدة , ولو في شمس يكون أفضل ,
- أفضل معدل لزيادة أو نقصان الوزن ؟!
شوفي عشان تنزلي أو تزيدي بشكل طبيعي وصحي , وعشان تحافظي عليه للأبد ,
يفضل أنو خلال الشهر الواحد ماتنقصي أو تزيدي أكتر من 4 كيلو ,
وأهم نقطة فالوزن أنو تنبتهي من اللعب بالوزن بالنزول والزيادة ,
حاولي تثبتي , يعني نزلتي الشهر دا 4 كيلو , اثبتي عليها لمدة أسبوعين , بعدين أرجعي نزلي 4 كيلو للشهر إلي بعدو ,
وهكذا كل مانزلتي كيلوات أثبتي عليها فترة بعدين أرجعي نزلي وزنك ,
عشان مايصير لخبطة ونزول وزيادة , وكمان تتعودي تحافظي عليها على طول ,
طبعاً نفس الكلام للي حابة تزيد وزنها ,
- إيش علاقة الرياضة والصحة والجمال مع بعض ؟!
الرياضة هيا أساس الصحة , والصحة هيا أساس الجمال ,
يعني :
عدم الحركة و ممارسة الرياضة يأثر ع الصحة , لو حتى ع المدى البعيد ,
وشي طبيعي ومعروف لما صحتك ماتكون كويسة جمالك يتأثر , من ناحية البشرة والشعر وكل شي ,
رياضة + تغذية صحية وسليمة = جمال ,
أمشي ع المعادلة دي وشوفي الفرق ,
ح تلاحظي كيف بشرة جسمك لو كانت تعاني من عدم توحد اللون مع الوقت تتحسن , ليش ؟!
لأنو الرياضة تخلي الدورة الدموية تتحرك فالجسم كامل , وتكوني معدلة أكلك ونسبة الخضروات فيه عالية ,
هنا جسمك أستفاد بالكامل لكل جزء فيه , من الفوائد الموجودة فيها ,
- التمارين متعبة ومو قادرة أتحمس معاها ؟!
أول شي أنتي لا تحطي في بالك أنا متعبة ومرهقة ومملة , تاني شي أنتي هيئي الجو المناسب لك , وإلي يخليك تنبسطي وتتسلي ,
الرياضة مو شرط تكون لحل مشكلة فجسمك , هيا ممكن تكون نمط فحياتك ,
كمان هيا جداً مفيدة لصحتك الجسدية والنفسية , لأنك لما تتحركي وتبذلي مجهود تحسي بإنجاز وتنبسطي ,
بدال الجلسة بدون عمل أي حركة ولا أي شي مفيد ,
شغلي ميوزك تحمسك , اعملي التمارين قدام المراية , لو حسيتي بتعب أو ملل أوقفي وحولي ع الرقص شويتين ,
أعملي أي شي يبعد الملل ويخليك تستمتعي وتتحمسي كل يوم لفترة التمرين ,
وممكن كـ حل أفضل ويناسب أغلب البنات ,
إلي هو أنك تعملي التمارين بالرقص وصل الله وبارك , هنا أضمن لك تحبي الرياضة وتستمتعي , XD
ولا تستني أحد يشجعك , أنتي شجعي نفسك بنفسك ,
مهما أحد شجعك يجي وقت ينشغل أو يمل ويبطل يصير فيه تشجيع وحماس لك ,
وهنا تبدأي تتحطمي وتوقفي ,
فمن البداية خلي نفسك المشجع لأنو نفسك ما ح تترك فيوم ولا ح تمل من تشجيعك , =P
- متى أحتاج المكملات الغذائية ؟!
غالباً لو كان أكلك تمام فأنتي ما ح تحتاجيها بإذن الله ,
ممكن فيه أجسام أوقات ماتستفيد بالكامل من الفوائد فالأكل الطبيعي , هنا ممكن تلجئي لها ,
بس بعد إستشارة الدكتور تبعك ,
وبنظري وعن تجربة شخصية ,
التمر هو أفضل مكمل غذائي , جد التمر كنز جداً جميل ومفيد ,
يومياً ابدأي يومك أقل شي بخمس حبات , مع كوب لبن أو حليب أو حتى علبة زبادي ,
وأنا أضمن لك صحة عال العال , وأضمن لك فوائد كبيرة جداً ,
- كيف ممكن أتجنب الترهلات والتشققات ؟!
هنا أقلك لازم تنتبهي لجسمك سواء كان بزيادة أو نقصان الوزن , لأنو أحتمال حدوث الترهلات والتشققات كبير جداً ,
طيب كيف تحمي نفسك ؟
أول شي بالنسبة للترهل , أنا من قبل قلت نزول وزيادة الوزن لازم يكون على مهل عشان تتحكمي فالشد ,
لأن وزنك لو نزل أو زاد بسرعة وبشكل كبير الجسم ممكن مايلحق ع الشد , ونفس الشي بالنسبة للتشققات ,
أحيانا فيه درجة من الترهلات يصير صعب شدها ويصير وقتها تحتاج عملية تجميلة ,
والترهل نتكلم عنو للجسم كامل مع الصدر كمان ,
تاني شي التشققات كالعادة والمعروف عشان ماتشوفيها , أهتمي بالترطيب ثم الترطيب ثم الترطيب ,
رطبي جسمك بمرطب محترم وعالي , أشربي موية أو عصير قبل وأثناء وبعد التمرين ضرورررررري ,
خلي الترطيب فحياتك اليومية سواء بالتمرين أو بدونو ,
بخصوص الصدر :
سبق وقلت اهتمي بلبس البرا المناسبة , مو تلبسي البرا العادية لا البسي المخصصة للرياضة ,
سواء وقت التمارين أو وقت المشي ,
وبالنسبة للبسك للبرا فبقية يومك , ألبسي المقاس والشكل المناسب لصدرك ,
لأنو حتى الظهر والأكتاف تتأثر من لبسك للبرا لو ماكانت مناسبة ,
حاولي تبتعدي عن المويا الدافية ع الصدر والجسم عموماً , وحاولي تغسليه بموية بااردة , أو تمرري عليه تلج ,
وأهتمي بالمساج للصدر ,
" إن شاء الله ح أتكلم فتدوينة مفصلة عن دي الأشياء "
- ضروري أستخدم الأثقال فالتمارين ؟!
طيب أقلك لو حابة تستفيدي بشكل أكبر من التمارين أستخدميها , لا تقوليلي تطلع عضلات XD ,
خدي وزن خفيف على قدك وأشتغلي ,
لأن فيه تمارين لما تعمليها وتكوني تستخدمي الدمبلز معاها يصير فيه شد أكتر وتركيز أكتر بين التمرين وتحريك الدمبلز ,
- عندي مشكلة صحية هل ينفع أعمل تمارين ؟!
يعتمد على نوع المشكلة الصحية إلي تعاني منها ,
وهنا أقلك لو عندك مشكلة صحية مثلاً حامل أو دوبك خلفتي أو تستخدمي موانع للحمل ,
عندك ضغط أو سكر أي شي كان , أو تستخدمي دواء معين هنا لازم قبل تعملي أي خطوة أسألي الدكتور تبعك ,
لأنو هو يكون عارف حالتك ودرجتها ومتى الوقت المناسب وقد إيش الجهد إلي تقدري تبذليه ,
بس عموماً مافي مشكلة صحية تمنعك من التمارين نهائياً , ممكن يكون بشكل أخف ووقت أقل ,
مثلاً أحياناً إلي عندهم مشاكل فالعظام وكبار السن خصوصاً , يكون تكتفي بالتمارين فالمسبح لأنو المسبح ح يخفف من ثقل وضغط الجسم ع العظام والركب , بس فنفس الوقت ح تستفيد من التمرين زي لو كانت برا المسبح ,
فالأخير أنتي لو تفهمي جسمك , وتفهمي طبيعتو , وقتها ح تتحكمي فيه مو هو يتحكم فيك وتتعبي معاه ,
التدوينة مجرد هرج بأريحية فمعليش لو كان مو مرتب الكلام وكدا ,
حاولت قد ما أقدر أحكي عن المفيد وجا فبالي , لو عندكم أي سؤال أو إستفسار أتفضلو ,
ملاحظة :
أمثلة الوجبات قلتها كدا من باب التوضيح , يعني ماتتقيدو فيها بس ,
أبدأي وجبتك بالشوربة والسلطة عشان تشبعي أسرع وبسعرات أقل , طبعاً أثنينهم بدون صوص أو كريمة ,
هنا تدوينات كمان ح تفيدكم ف نفس الموضوع :
’
|
للتواصل
إيميل :
samanoos67@gmail.com
